Ширин стха, и дуьнья кьван багьади,
Вун савкьват я, заз ганавай Худади,
Валай рикlиз авайди туш мукьвади,
Зи руьгьдин хъвер, зи рикl-жигер, стха чан!
Чун чаз гила яргъал-яргъал аквазва,
Телефондай вуч гьал лугьуз рахазва,
Анжах рикlел вун датlана алазва,
Зи руьгьдин хъвер, зи рикl-жигер, стха чан!
Вирида куьн са ухшар я лугьузва,
Чи кьве рикlни, цава са рагъ хьиз кузва.
Вун хьтинди дидеди мад рухузмач,
Зи руьгьдин хъвер,зи рикl- жигер, стха чан!
Къуй гьар вахан, стхаяр хуьй Аллагьди,
Лувар кувай хьиз къекъуьрай дамахдив.
Уьмуьр гурай, яд хьиз зам-зам булахдин,
Зи руьгьдин хъвер, зи рикl-жигер, стха чан!
Секина. Стхадиз
© Copyright: Магомед Мирзоев Мирзой, 2025
Свидетельство о публикации №125101106494
Свидетельство о публикации №125101106494
Рецензии