За ахварик сустда вун, зи азизди,
Капан юкьвал эцигна, са хиял хьиз.
П1узаррилай муьгьуьбатдин гьавиздин
Яд эличиз, ширин-ширин ст1ал хьиз.
Гьинай гьатна ваз и абур, гуьзел тир,
Язух рик1ер кабабзава ви назди,
Зун эвелай ви сесинал мягьтел тир,
Гила кузва, айибмир, ви тавазди.
Руьгьдин къеняй акъуч1ай цуьк, тар хьтин,
Яд такуна кьураз, аман гьайиф я.
Алатайт1а рик1елай, ахвар хьтин,
Амукьда вун фикирда зи зариф яз.
Бахтлу кас я уьмуьрдин дад акурди,
Ашкъидикай чирагъ хьанай мич1ерин.
Кьисметдин пар хьайит1ани агъурдиз,
Чим амукьда хура туьхвей гьисерин.
На багъишай гуьзел дердер себеб яз,
Зун манияр лугьуз вакай къекъведа.
Рик1ел хтайла гьар сефер, эдеб яз,
Ви хуш къамат, гъамлудаказ хъуьреда!
За ахварик сустда
© Copyright: Магомед Мирзоев Мирзой, 2025
Свидетельство о публикации №125092602477
Свидетельство о публикации №125092602477
Рецензии