Къонах велхар халкъан дийцар

Кхура кlел, lиндагlехь воккха стаг lара.
Кlентан воl ловзура, лестабеш сара,

Ма ида бахаре ца ухьуш лерг.
Дlакхетта вилхира, лазийна пlелг.

Ткъа дендас, човхавен кеп хlоттош, кlант
Хьехар дан тlекхайкхи, хlоттийна гlант.

Борз йелхар - элира - ду хьуна эхь.
Доьналла декхар ду, къонахчун тlехь.

Чlагlо йе ца баккха кхул тlаьхьа чlикъ.
Мел хала хиларх а, ма ала къикъ.

Пхийттара ма-велли, са доккхуш чlана,
Цамгаро хьовзийна, кхелхира нана.

Воьлху кlант, вегавеш, ца сецош аз.
Готта ду баланна и некхан ваз.

Чувели денда а, байн боккхуш ког,
Догъэца, дахаро тоьхначун ног.

Белша тlе куьг дуьллуш, цо лохха эли:
"Тахана хьан кхерчахь йаьгна цlе хели.

Хьан бlаьрхиш гина дац хlинццалца цхьанна.
Ткъа хlинца йелхалахь, къона борз, нанна.

Къонах вац, ца воьлхург, дlайаьлчи нана.
Со воьлху сайн нанна, йаьллехь а зама".

Дахаро масалш а гайтина шорта.
Уьш тида хаар ду хlоранна коьрта.

Деригге дезаш ду дустарца лара.
Тахана нийса дерг кхана ду гара.