Паремии Пророку Моисею

СЛУЖБА СВЯТОМУ ПРОРОКУ БОГОВИДЦУ МОИСЕЮ

Паремии Пророку Моисею
1.  Исхода чтение.
 (Явление Бога в Неопалимой купине).

Моисей же бяше пасый овцы Иофора тестя своего, священника Мадиамска: и гнаше овцы в пустыню, и прииде в гору Божию Хорив. Явися же ему Ангел Господнь в пламени огненне из купины: и видит, яко купина горит огнем, купина же не сгараше. Рече же Моисей: мимошед увижду видение великое сие, яко не сгарает купина. Егда же виде Господь, яко приступает видети, воззва его Господь из купины, глаголя: Моисее, Моисее. Он же рече: что есть, Господи? Он же рече: не приближайся семо: изуй сапоги от ног твоих: место бо, на немже ты стоиши, земля свята есть. И рече ему: Аз есмь Бог отца твоего, Бог Авраамов и Бог Исааков и Бог Иаковль. Отврати же Моисей лице свое: благоговеяше бо воззрети пред Бога.

2. Второзакония чтение.
 (Кончина Моисея и свидетельство о нем).

И  рече Господь к Моисею: сия земля, еюже кляхся Аврааму и Исааку и Иакову, глаголя: семени вашему дам ю: и показах ю очесем твоим, и тамо не внидеши. И скончася тамо Моисей раб Господень в земли Моавли словом Господним. И погребоша его в земли Моавли близ дому Фогорова. И не уведа никтоже погребения его даже до дне сего. Моисею же бе сто и двадесять лет, егда скончася: не отемнесте очи его, ни истлеста устне его. И плакашася сынове Израилевы Моисеа во Аравофе Моавли у Иордана близ Иерихона тридесять дний. И скончашася дние плача сетования о Моисее. И Иисус сын Навин наполнися духом разума: возложи бо Моисей руце свои на него. И послушаша его сынове Израилевы, и сотвориша якоже заповеда Господь Моисею. И не воста ктому пророк во Израили якоже Моисей.  (Втор.34:1-10).

3. Пророчества Исаиино чтение  (Пророчество о Мессии, которому служил прообразом Моисей)

Дух Господень на Мне, Егоже ради помаза Мя, благовестити нищым посла Мя, изцелити сокрушенныя сердцем, проповедати пленником отпущение и слепым прозрение, нарещи лето Господне приятно и день воздаяния, утешити вся плачущыя, дати плачущым Сиона славу вместо пепела, помазание веселия плачущым, украшение славы вместо, духа уныния: и нарекутся родове правды насаждение Господне во славу. вы же священницы Господни наречетеся, служителие Бога вашего, речется вам: крепость язык снесте и в богатстве их чудни будете. Сице землю свою вторицею наследят, и веселие вечное над главою их. Аз бо есмь Господь любяй правду и ненавидяй грабления от неправды: и дам труд их праведником и завет вечен завещаю им. И познается во языцех семя их, и внуцы их посреде людий: всяк видяй я познает я, яко сии суть семя благословено от Бога, и радостию возрадуются о Господе. Да возрадуется душа моя о Господе: облече бо мя в ризу спасения и одеждею веселия (одея мя): яко на жениха возложи на мя венец, и яко невесту украси мя красотою. И яко земля растящая цвет свой, и яко вертоград семена своя прозябает: тако возрастит Господь правду и веселие пред всеми языки (Ис.61:1-3,6-11).

Седальны по кафизмам

После 1-й кафизмы

Явлейся Купина; неопалимая, пророче Божий, предвозвестил еси Небесная, Моисее Боговидче: безсеменно бо во чреве Девы вселитися Бога плотию провидев, просветил еси тайну благодати. Темже, яко верный служитель и друг Божий, моли спастися душам нашим.

После 2-й кафизмы:

На гору Синайскую возшед, закон от Бога приял еси, скрижали начертания Духа, Моисее всеславне, имиже наставил еси люди твоя. Темже и мы, твою память празднующе, зовем ти: моли Христа Бога, грехов оставление даровати чтущим любовию святую память твою.

Седален по полиелее

Дивнаго чудес твоих совершившаго, пророче, Христа; воспеваем, имже фараона с колесницами в море Чермное потопил еси, и люди избавил еси, Моисее Богоглаголиве. Темже, яко имеяй велие дерзновение ко Господу, моли даровати миру велию милость и душам нашим спасение.