Вун са миск1ал я, зи къилих,
Зун вал гагь-гагь жезва мягьтел
Зи къаст туш вак кутун синих,
Амма вакай къвезва заз хъел.
Гагь жезва вун дердерин гьуьл,
Гагь я къайи мурк1адин дагъ,
Фараш ийиз бубуйрин чуьл,
Гагь жеда вун чим гузвай рагъ.
Гагь вун Камбар булах жеда,
Ширшир ийиз авахьзавай,
Гагь ч1ижерин мулах жеда,
Вирт п1узарлай алахьзавай.
Бугъ алахьиз, ргаз жеда
Ц1аял алай къажгъан хьтин,
Уф алахьиз, дак1ваз жеда,
Самар тунвай бажгъан хьтин.
Гагь вуна зун хуьда харуз,
Нинияр гвай гъвеч1и руш хьиз.
Гагь акъудда на зун цавуз,
Лув гуз къаних симург къуш хьиз
Тавуна ваз авач чара,
Гайи ч1авуз рик1и буйругъ.
Са гъуд кьвандаз авай хура
Гьазур я вун ийиз къуллугъ!
Зи къилих
© Copyright: Тамила Хуршидова Салманова, 2025
Свидетельство о публикации №125071205394
Свидетельство о публикации №125071205394
Рецензии