Нурар вегьиз, цавун аршда тек авай
Ракъинин, къе, акунар гуьрчек ава.
Гьар жуьредин цуьквер алай парча хьиз,
Дагъдин хурар ч1агурнава, ханча хьиз...
Шагьвардини лепейривди кинариз,
Кьвези буба басмишзава ахвариз.
Гагь аквадай бармак адан кук1уш хьиз,
Гагь гуьнедин рехи хьанвай уьруьш хьиз.
Лекь акурди, хкадарна синелай,
Чархар ийиз лув гузавай винелай,
Кьвези касдин вилери ц1ар-ц1ар гана,
Виниз хьана, спелариз звар гана.
Пара вахт тир, чидач вучиз, лекьерин
Сес техьена такабурдин эвэрин.
Цававайди такабурдин чешне я.
Кьегьалвални такабурдин пеше я.
Лекь цавариз хкаж хьанва лезет яз,
Лекьрен абур гьар дестедиз къимет я.
Садазни лекь лугьуникай т1ул жедач,
Я лекьерин кьадарни-сан бул жедач.
Лекь хьун патал инсандиз лув герек туш,
Кьегьалвални я къуват я жендек туш.
Вик1егьвални намус руьгьдин тегьер я,
Вик1егь руьгьер чи ватандин бегьер я.
Лекь хьун патал инсандиз лув герек туш
© Copyright: Магомед Мирзоев Мирзой, 2025
Свидетельство о публикации №125060506821
Свидетельство о публикации №125060506821
Рецензии