Шут1

Садлагьана, виридан яз сивелай,
Там ац1узвай хур къазунир сесерив.
Кьил акъудиз вири инал къвазнавай:
Вуж ят1а и таквазвайди вилериз?

Гьарай-эвер жедайди я виринра.
Гьайванариз и кардикай сир хьана.
Садлагьана ниэдив там ац1айла,
Вирибуруз ам шут1 тирди чир хьана.

Первердигар, къурбанд хьуй ви туп1ариз:
Ви аламат таквадай кьван пара я!
Вилиз таквар и гьайвандин хурукай
Хкат тийиз, гьайванар бейчара я.

Къудгуна шут1 акьахна фад к1анч1унал,
Кьил хкажна акъвазна са аслан хьиз.
Са метридин мез галудна кьулахъай,
Башламишна рахаз ч1ехи султан хьиз.

Я кьей хва шут1, ви къеневайди вуч я?
Бомбади хьиз, гьавани кваз къурсариз.
Чат кепекдин кавачир са шиблякь яз,
Акъвазнава вун татугай фурсариз.

Вич таквадай зат1ни тушиз хьайила,
Аквар гьалда мез я адан ч1ехиди.
Мез рахазвай иесини къугъвариз,
К1ан я вичиз яб гудай са гижиди.

Гагь-гагь мецез иесидхъай регъуь тир:
Амал гвачир иеси низ герек я?
Чара авач, авун к1ан я тарифар
Иесидин, тахьайт1а ам хенек я.

Бахтлубур я ихьтин мецер авайбур,
Са хийирни авачирла акьулдихъ.
Пайдах хьтин къаю тухуз к1анинихъ,
Я абурни тахьай ч1авуз асулдихъ.