Молитва О Всемилостивая Госпоже Богородица

               
 О Всемилостивая Госпоже Богородице, Небесная Царице, Все мощная Заступнице,
 непостыдное наше Упование! Благодарим Тебя о всех благодеяниях, российским людям
 от Тебе бывших, от древле и до днесь от чудотворные иконы Твоей явленных.       
 И ныне, Преблагая Владычице, призри на нас грешные и недостойные рабы Твоя,   
 яви нам милость Твою и моли Сына Твоего, Христа Бога нашего, о еже избавится нам
 от всякого зла и сохранится всякому граду и веси, и всей стране нашей от глада,
 губительного труса, потопа, огня, меча, нашествия иноплеменных и междоусобные
 брани. Испроси православным христианам благоденственное и мирное житие, здравие,
 долгоденствие, во всем благое поспешное и спасение. Сохрани и умудри пастырей
 Церкви, еже достойно пасти стадо Христово и право править слово истины; укрепи
 христолюбивое всероссийское воинство, подай дух совета и разума военачальником,
 градоначальником и всем, иже во власти суть, ниспошли святое Твое благословение 
 и всем православным христианам, поклоняющимся Тебе и молящимся пред целебной
 богоносной Твоею иконою. Буди нам Заступница и Ходатаица пред престолом
 Всевышнего, идеже предстоишь. К кому убо прибегнем, аще не к Тебе, Владычице?
 Кому принесем слезы и воздыхания, аще не к Тебе, Пресвятая Богородице?         
 Не имамы бо иные помощи, не имамы иные надежды, разве Тебе, Небесная Царице.       
 Под Твой покров притекаем, молитвами Твоими ниспошли нам мир, здравие, земли
 плодоносит, воздуха благорастворение, избави нас от всяких бед и скорбей, от
 всяких недугов и болезней, от внезапные смерти и от всех озлоблений врагов
 видимых и невидимых. Вразуми и научи нас о, Всемилостивая Заступнице, како
 безгрешно прейти путь земного сего жития. Ты веси немощи наша, веси и согрешения
 наша, но и веру веси, и упование видишь, даруй же нам исправление греховные жизни
 и умягчи злая сердца наша. Укрепи в нас правую веру, вложи в сердца наша дух
 страха Божия, дух благочестия, дух смирения, терпения и любви, в добрых делах
 преуспеяние, избави же нас от искушений, от пагубных душе вредных учений, от
 неверия, развращения и погибели вечные. Тебе убо просим, Пречистая Владычице, и
 припадающее пред святою Твоею иконою, молимся, умилосердись на нас и помилуй нас
 в страшный же день суда ходатайством и заступлением Твоим сподобив нас стати
 одесную Сына Твоего, Христа Бога нашего, Ему же подобает всякая слава, честь и
 поклонение, со Безначальным Его Отцом, и Пресвятым и Благим и Единосущным Его
 Духом, ныне и присно и во веки веков.               
               
                Аминь.