За кьена жал умудар ви...
Ргазмачни тахда иви?
Туш кьван лугьуз ният кIеви,
Вегь тегьнеяр вуна сел хьиз,
Жедач завай вакай хъелиз…
Гьиссер гарув гана лугьуз,
Чиз-чиз хатур хана лугьуз,
Чимибур гьикI къана лугьуз-
Хъухъванвай рикI хьурай шелиз,
Жедач завай вакай хъелиз.
Гьардаз ава вичин тIалар,
КIанивал туш гафар-чIалар...
Къизгъинариз вири къалар,
Гъамар кIватI хьуй руьгьда мелиз,
Жедач завай вакай хъелиз.
Винел саврух атурай лап,
Гапурди хьиз атIурай лап!
Эхир тирди кьатIурай лап-
Садра кхьей цIарар кIелиз,
Жедач завай вакай хъелиз…
29.05.2025
Жедач завай
© Copyright: Билал Адилов, 2025
Свидетельство о публикации №125053103262
Свидетельство о публикации №125053103262
Рецензии