Заз к1анзава лугьуз къе квез, балаяр,
Куьн я гьелбет гележегдин къалаяр,
Квекай хьурай дидеярни бубаяр,
Сад Аллагьди хуьрай куьн, чан ширинбур!
Куьн уьмуьрдин цуькверни я , бегьерни,
Цуькверилай к1ват1навай вирт, шекерни,
Чи руьгьерин куьк1венавай экверни,
Сад Аллагьди хуьрай куьн, чан ширинбур!
Куь мержандин вилерал нагъв тахьурай,
Назик чанар сагъ-саламат акурай,
Куь гъавурда вири фад, дуьз акьурай,
Сад Аллагьди хуьрай куьн, чан ширинбур!
Къуй Аллагьди уьмуьр гурай бахтлуди,
Писликвилер такурай квез къанлудин,
Гъамишанлугъ гьахъвал хьурай далудихъ,
Сад Аллагьди хуьрай куьн, чан ширинбур!
Мугьманар я чун дуьньядиз атанвай,
Кьуьдни гала къе гатфарихъ диганвай,
Дуьзвилин рехъ виридалай ч1аганва,
Сад Аллагьди хуьрай куьн, чан ширинбур!
Секина. Къуй Аллагьди хуьрай вири балаяр
© Copyright: Магомед Мирзоев Мирзой, 2025
Свидетельство о публикации №125052405999
Свидетельство о публикации №125052405999
Рецензии