К1арасдалди туьк1уьрнавай варарин,
Аквазва заз эски хьайи нехишар.
Мецел алай ширин са т1вар тикрариз
Къвазнава зун, рик1ел хкиз еришар.
П1инид тарни гатфарихъ вуч иер я,
Дуьгуьр кьилел алук1навай свас хьтин.
Заз акурди, яраб, вучтин тегьер я,
Ч1агурна хьиз лап гуьзел атлас хьтин.
Цуькверихъай атирди ни атайла
За вуч лугьун, ам абурун адет я.
Ви гьиссерин дак1арар за гатайла,
Саймиш тавун, жизви кьванни, къелет я.
Гьикьван к1ант1а къекъвейт1ани дамахдив,
Къиметчияр - тахсирар я акунрин.
Уст1а ят1а суьретчи буй-бухахдин,
Зунни гьак1да уст1а я ви ч1агунрин.
Килигайла гуьрчеквилиз суьретдин,
Устаддин т1вар алатдач хьи рик1елай.
Энгел жемир, хкваш на гагь гьуьрметдив
Рик1ел инсан, ви акунри мягьтелай.
Энгел жемир
© Copyright: Магомед Мирзоев Мирзой, 2025
Свидетельство о публикации №125052402625
Свидетельство о публикации №125052402625
Рецензии