Хана ч1ехи авуна руш,
Акунариз са т1авус къуш,
Акьуллу ва милаим хуш,
Чаз гана на , къавумдин паб !
Лагьана им руш физвай к1вал,
Хуькуьрнач на калымдик кьал,
Жегьиларин арайра сал,
Тунач вуна ,къавумдин паб !
К1вал лезетдив ийиз ч1агур,
Ч1ехибурун хвена хатур,
Ви балади акур-такур,
Гваз къекъвенач, къавумдин паб!
Сир акъуднач къецел к1валин,
Гьар са пеше квазва гъилин,
Мецел алаз шуьрбет ширин,
Рахазва ам ,къавумдин паб !
Чизвач зун-вун лугьудай ч1ал ,
Хзандани я хьанач къал,
Къени хьурай свас атай к1вал,
Лугьуз хьана , къавумдин паб!
Тербия я багьа девлет,
Сад лугьудайди я гьуьрмет,
Адахъ галаз бахт-берекет,
Къведа гьелбет,къавумдин паб!
Секина. Къавумдин паб
© Copyright: Магомед Мирзоев Мирзой, 2025
Свидетельство о публикации №125051806656
Свидетельство о публикации №125051806656
Рецензии