Килиг садра язух п1ирен тарариз,
Кьил агъузна акъвазнавай, ялвариз
Ялгъуздаказ, рекьин патав сир хьана.
Килигайди амукьда таъсир хьана.
Какур гъилер аладарна чилелай,
Хъвер аквадач фугъарадин сивелай.
Т1арам акун абурдин са лишан я,
Чарадан дерт гьисс авурди лукьман я.
Такабурвал- ам уьлчме туш бармакдин,
К1ант1а жуваз хам алажа барц1акдин.
Ашукьбур жувални хьанай русвагьни,
Квахьна фенай намус квахьай пачагьни.
Сир кьат1айдаз, негьякь дуьнья дар жеда,
Усалбурун сивел вичин т1вар жеда.
Писвал аваз рик1е, гайи хийир кьий,
Буш келледа авай негьякь фикир кьий.
К1ан тахьайди, хирде кьванни куьмекиз,
Саваб крар алахънава гьелекиз.
Инсандин руьгь рехъ жагъайдаз - ам п1ир я,
Вун гьамиша ви кьисметдин есир я.
Чешне ая амалрикай гьалалдин:
Нубат кьунва, хабар т1акьаз ажалди.
7- Какур гъилер аладарна... Беневша
© Copyright: Магомед Мирзоев Мирзой, 2025
Свидетельство о публикации №125051505700
Свидетельство о публикации №125051505700
Рецензии