Гуьрчеквиляй акунари маралдин
Хуш ийизва заз шикилар хиялдин.
Агъзурарин арадай ви вилери
Секинзава теспача зи дердерин.
Аламат я, килигай са легьзеда,
Руьгьдини гил ялзава ви мягьледал.
Ачуха на ви сирерин т1ап1арар,
Мумкин я бахт акъвазнава рак1арал.
Эрзиман я, са дурнади луварив
Кинар авун, ширин гафар тикрариз.
За манияр лагьай экуь йифериз,
Кьил агъуздай сес галукьай цуьквери.
Илгьамди нур галукьай са геренда,
Ялав фена, агь акъатна бедендай.
Гьар камуниз ви буй-тегьер пайгар я,
Рик1ивай вун зи бахтуниз ухшар я.
Саламатрай назик гьисер – мурад я,
Вун гьамиша зи ашкъидин баяд я.
12 Гуьрчеквиляй акунари... Беневша
© Copyright: Магомед Мирзоев Мирзой, 2025
Свидетельство о публикации №125051502330
Свидетельство о публикации №125051502330
Рецензии