Лезги рушал эцигда т1вар
Виридалай иер, масан.
Анжах къуьне жеч лезги квар,
Цел фидайла лезги сусан.
Дагъдин хуьре акуна руш-
Лезги тават, дагъдин марал.
Са хуп1 яд гай женнетдин къуш,
Битмиш хьайи ич хьиз тарал.
Регъуьз-кич1ез лагьана т1вар:
Лезгият я, дидед мурад!
Ачух юкъуз къвада жал хар,
Рик1е гьатна хабарсуз гад.
Лезгият т1вар тикрар хъийиз,
Хъ(и)фена зун жуван хуьруьз.
Ажайиб т1вар акъат тийиз.
Ифена рик1, такваз вилиз.
Лезгиятан гуьрчегвили
Зи рик1 даим есирна хьи,
Бегьер гъида лезгивили,
Лезги руша таъсирна хьи.
Сагърай уьмуьр гуз дидеяр,
Вик1егь хвани гуьрчег рушар.
Умудлу я,жед вядеяр-
Лезгивилиз хьурай ухшар.
12.05.2025
Лезгият
© Copyright: Нажмудин Шихнабиев 2, 2025
Свидетельство о публикации №125051205658
Свидетельство о публикации №125051205658
Рецензии