Чи кьулухъай рахун - куьгьне адет я,
Рахадайдаз фитне - ширин нямет я.
Ахмакьвал я, вуч ийин, гьалал хьурай,
Бейтерикай вичиз шк1уьд т1вал хьурай.
Бугьтанчияр кьегьалриз гьич ухшар туш,
Жувандан рик1 т1ар авун им гьунар туш.
Садаз вичин акьулдикай пар жеда,
Архайин к1вале дуьньяни дар жеда.
Низ герек я и вядеда кхьинар,
Дуьньядин тариф я ац1ай жибинар.
Агъа жеда девлет авайла хебни,
Лазим амач я гьая, я эдебни.
Нефс ац1удач азгъунданни усалдан,
Усал кардал гьар-гьамиша амалда.
Лекь хьиз кьегьал, хкаж хьана цавариз,
Таза гьава луваривди юзариз
Къугъванайт1а, алчахвилиз к1ур гана,
Аквадай чун уьзягъвили нур гана.
6- Бейтерикай шк1уьдин т1вал хьурай. Беневша
© Copyright: Магомед Мирзоев Мирзой, 2025
Свидетельство о публикации №125051203586
Свидетельство о публикации №125051203586
Рецензии