Уьц1уь-цуру и дуьньядин чир хьана,
К1вач эцигайди зурба шаир хьана.
Устадвилелди сад-садахъ гилигна,
Лацу чарчел, мерженар хьиз, эцигна.
Мерженарни девлет-багъдихъ дегишна,
Лейлидикай гуьрчеквилин нехишна.
Гъейридакай ашкъи-гьевесдин тажна,
Вичин къалам цавариз кьван хкажна.
Ашукь хьана вич вичелни, тарифиз,
Чарадан хат1, усал акваз, зайифиз...
Гьар дамахдиз вичин ери-сан ава,
Дуьз лагьайт1а, гьадахъни заман ава.
Устадвилиз къамат авач, гаф лугьун,
Гьар келима, пис тушир, инсаф лугьун.
Гьар са гафни лугьузва, лап къизил я.
Дуьз лагьайт1а, зунни адал пехил я.
Къизил гудай я перс амач, я ханни-
Ругъу кьунва шииратдин бустанни.
1-устадвилиз къамат авач. беневша поэмадай
© Copyright: Магомед Мирзоев Мирзой, 2025
Свидетельство о публикации №125051104391
Свидетельство о публикации №125051104391
Рецензии