Ви манидихъ вил гала чи, Фаризат!

Акваз-акваз ац1урзавай гьевесдив,
Ви манидихъ вил гала чи, Фаризат!
Ширин аваз, мадни ширин я сесни,
Ви манидихъ вил гала чи, Фаризат!

Лагьанай за, бахтавар я и жейран,
Ви акунрал хьайи макъамда гьейран,
Ви зегьметни бустан хьиз я авадан,
Ви манидихъ вил гала чи, Фаризат!

Хатур ханач, четинвилиз к1ур гана,
Сегьер хьтин атанай вун, нур гана,               
Усалбурун фитнедизни тур гана.
Ви манидихъ вил гала чи, Фаризат!

Дамах квахьна, сегьнедава къе садбур
Авачирди зигьин жедач хьи машгьур.
Мадни виниз хкаж на кьил такабур,
Ви манидихъ вил гала чи, Фаризат!

Садбурунни макьам санай, ц1ар санай,
Хиве т1акьаз хиял санай, кар санай.
Ви къаматдин тариф ава гьар сана,
Ви манидихъ вил гала чи, Фаризат!

Дердерикай хабар кьадай кас жедач,
Лаз алтадай къизилдикай арс жедач,
Бишибуруз к1ани кьван лагь, тарс жедач.
Ви манидихъ вил гала чи, Фаризат!

Вун багъларин метлеб авай майва я,
Ви буй-бухах муьгьуьбатдин гьава я,
Сугъул рик1из ви ширин сес дава я,
Ви манидихъ вил гала чи, Фаризат!

Рагьимата теснифнавай ц1ар авай
Бендина ви, гевгьер хьтин т1вар ава.
Рик1е авай хиялдиз ухшар авай,
Ви манидихъ вил гала чи, Фаризат!