Гьикьван лагьайт1ани вуна сефилдиз,
Вил элкъуьриз, ц1ару хьанвай суварлай:
"Дак1ан я заз килигиз и шикилдиз
Зулун йикъан,- гъил элягъиз ч1арарлай.
- Заз к1анзамач адан къизил либасар,
Хьайит1ани свасалайни иер яз.
Къекъвейт1а зун, алук1на пак ат1ласар,
Лугьудачни: "Иданди вуч тегьер я?"
-Зул гатфариз элкъведа са геренда,
Чи гатфарар хкведач мад, гьайиф я!"
Кисна тават, ч1угвазвай за кетендал.
Гуьрчеквилиз килигайла - зариф я!
"Гуьзел тават, виридалай ширинди,
Агалкьнавай атирлу тир емиш я.
Куьгьне, т1ямлу чехир авай гичиндин
Къимет - гьа вич ац1ай якъут, гимиш я.
Яшар хьайи инсан им са ктаб я,
Гьар са чинихъ, гьар са ц1арц1ихъ сир авай.
И кардизни фикир тагун гъалаб я:
Гьар са яшдиз вичиз хас девир ава".
Чи гатфарар хкведач
© Copyright: Магомед Мирзоев Мирзой, 2025
Свидетельство о публикации №125050408222
Свидетельство о публикации №125050408222
Рецензии