Секина. Зи хайи хуьр хуьруьгар

 Акъудайт1ан чун  кьисметди  яргъариз,
 Руьгь къекъведа хайи чилихъ ялвариз.
 Цуьквед кьунвай ятах хьиз я гатфариз,
 Зи хайи хуьр, зи к1ани хуьр, Хуьруьгар !
               
 Заз багьа я ,зи дередин гьар кк1ал,               
 Заз багьа  я ,зи  куьчедин гьар  са кьал,               
 Заз багьа я, зи дидедин хайи ч1ал,               
 Зи хайи хуьр ,зи к1ани хуьр, Хуьруьгар !
               
 Ксайлани хиял хуьрел элкъвезва,               
 Гагь тамарихъ, гагь дагъларихъ гелкъвезва,               
 Гагь багърийрал кьил ч1угуна хквезва,               
 Зи хайи хуьр,зи к1ани хуьр, Хуьруьгар !
               
 Экъеч1навай цуьк хьиз суван береда,               
 На къужахда  кьазва чун са легьзеда,               
 Экв гуз хуьзва руьгьери гьар вядеда,               
 Зи хайи хуьр, зи к1ани хуьр Хуьруьгар!

 Ви накьвадин деринрик дибер ква,               
 Шумудни са девирдин сирер ква,               
 Рик1е амаз туханвай  дердер ква,               
 Зи хайи хуьр,зи к1ани хуьр, Хуьруьгар!

 Самур вац1ун аваздин ван япава,               
 Игитарни  Ватан  хвейи  парава,               
 Ви балаяр вахъ рик1 куз гьар  патава,               
 Зи хайи хуьр, зи к1ани хуьр ,Хуьруьгар !