Кхьирай эсер...

Чара я сенгерар...санал я женгер,
Лугьумир, бес тахсир, нинди я, нинди?
Акъудиз жедани  чандай чан  мегер-
Ви фикир зун патал  хьана  кьилинди.

Зун тек а къаматдин есир туширни.
Вакай хабар гъидай экуьн ярари…
Парабур паталди са сир туширни,
Ракъурай жавабар кутаз цIарарик…

Йиф-югъ  вилерикай са вун карагдай!
Ахварай гъулгъула, кичIер агатдай,
Амма хиялра зун  кIвачел къарагъдай-
Вун авай, зи  руьгьдик лувар акатдай!

Килигмир  пел чIурна, хъвер герек я чаз,
Ша, кьамир къизилдай кисна акъвазун,
Лепеяр хьурай чи  саналди юзаз,
Пара я лугьумир чин- чинал рахун.

Са иер расал я гьар рикIел хкун,
Дамаррай  гьиссерин сел авахьиз фий,
Низ чидай, хьайибур  элкъвена хтун…
ВерцIивал, туькьуьлвал мад акахьиз фий.

Чара я сенгерар...санал я женгер,
Лугьумир бес тахсир, нинди я, нинди?
Алахъна кхьирай  руьгьерин эсер
Къе чун галкIурзавай  хурун зигьинди...
                28.04.2025