Узакъ джерлеге кетиб барабыз
Эшелонлагъа джюклениб.
Тауларыбызны тансыкълагъанлай,
Джюреклерибиз термилиб.
Орта Азиягъа элтиб атдыла
Юйлерибизни сыйырыб.
Бек сындырдыла, ачытдыла,
Шам джуртубуздан айырыб.
Ачлыкъ джарсыуну толу сынадыкъ
Топуракъ ашаб, ханс чайнаб.
Тёгерегибиз - къара къыйынлыкъ
Ачыкъ тюзде - сууукъ азаб.
Хапар берилди: «Ол башкеслени
Сиз къатларына бармагъыз.
Джылы кийим, чурукъ бермегиз,
Кёзлерине къарамагъыз».
«Эмеген», «сатлыкъ» деб атайдыла,
Миллетибизге сёлеше.
Биз а онгсуздан къырыла барабыз,
Къабын излерге кюреше.
къартларыбыз - сууукъдан,
Гитчелерибиз - ачлыкъдан.
Уланларыбыз - урушдан,
Тиширыула уа - тансыкъдан.
Ёлюб кетдиле бир-бири ызындан
Юйлерин джангызлай къоюб.
Къалдыла къурулай умутларындан,
Джазыу муратларын оюб.
Тюб эталмадыла джигер халкъымы,
Бузалмадыла диними.
Джюрек тилегим: джаратхан Аллах,
Сакъла мени миллетими.
Ко дню Возрождения Карачаевского народа
© Copyright: Джамиля Байрамукова, 2025
Свидетельство о публикации №125042005527
Свидетельство о публикации №125042005527
Рецензии