Амелий

Маьлек болып тувдынъ сен,
Яркыратып яшавды,
Кувыршактай ойнап сен,
Кувантасынъ кыралды.

Кенжапай сен кызалак,
Кишкенекей тайымшак,
Суьйдимли сен кувыршак,
Сондай сен кишкей ташак.

Бойын карыс, бир тармак,
Эртегиден келген кыз,
Кайдай сондай кувыршак,
Аювды енъен арсыз.

Сондай бизим арсыз кыз,
Ярасыклы ол юлдыз,
Юректе калдырган ыз,
Атайды суьйинткен кыз.

Машалла, сен, кызымыз,
Оьседи ол баламыз,
Йыйылды акылымыз,
Энди биз тынышлымыз.

Аьелерин эркелеп,
Ойын ойнай кезуьвлеп,
Атайларын ол етип,
Ойнаклайды кес-кеслеп.

Сондай бизим кызалак,
Амелий деген ташак,
Куьн мен айды алдаган,
Аювды да талдырган.

Атай минди табанга,
Тынышлы яшамага,
Анай калды тоьменде,
Тыншаймага оьленде.

Кытымыр ол кызалак,
Кайда да ол етеди,
Тийсе бирде каталак,
Ойнамага келеди.

Бар бизде бир ойыншык,
Амелий ол кувыршак,
Сондай айлангыш уршык,
Кишкенекей ол ташак!

Машалла сага, бала,
Коьз тиймесин, машалла,
Куванышлы тамаша,
Оьмиринъ болсын, яша!!!



  2021 год.