Биз яшадык яслыкта,
Ойсызлыкта, шатлыкта,
Кеше-куьндиз сайланып,
Танъа дейим айланып.
Дирек болды ата билек,
Кабыл болды ана тилек,
Тозбай агаш касыгым,
Ушып кетти яслыгым.
Шашылдылар тенълерим,
Кубылага, Керуьвге,
Боьлиндилер куьнлерим
Яман куьнге, аьруьвге.
Яслыгымда шыныккан
Кевдем бирден силкинди,
Талыннан ол майыскан,
Мутпас яслык куьнимди.
Меним алал тенълерим,
Тувра йолды алдылар,
Бос йибермей куьнлерин,
Шарлак уьйлер салдылар.
Ногайды айттырдылар,
От ягага кайттылар,
Ата-ана болдылар,
Мырадына толдылар.
2023 год.
Яслыкта
© Copyright: Альберт Тамакаев, 2025
Свидетельство о публикации №125040707653
Свидетельство о публикации №125040707653
Рецензии