Кырк кабат ата арка,
Янларды авысып,
Тавлы сувдай кан ага,
Тамырларда шабысып.
Ата каным янъырып,
Таза ниетин алган,
Анам ман толкынласып,
Таза сербеттей аккан.
Ата-баба асаба
Калдырды мага канын,
Ногайдан — ана тилин,
Шеркештен ол — намысын.
Карысты кан тамырда,
Шеркеш Пщы ол Гирейлер,
Аьдет йол туткан онда,
Оьзден болган аьдемлер.
Уллы суьюв адасып,
Састырды ол атамды,
Арслан юрекли болып,
Суьйди меним анамды.
Тоьс бойында яйылып,
Кызыл гуьллер атады,
Ораклы бий кызганып,
Сылув кызын тыяды.
Аьдет туткан ногайда
Намыс куьшли болады,
Кырк уьйден тыйылган кыз
Аьдет-йоллы болады.
Сондай сылувды коьрип,
Шер дуныясын мутты,
Ястынъ юреги ирип,
Кызды сол кеше утты.
2020 год.
Асаба
© Copyright: Альберт Тамакаев, 2025
Свидетельство о публикации №125040506998
Свидетельство о публикации №125040506998
Рецензии