Камбак — тувра янган от,
Атылмага еткен ок,
Язлык шакта — ясыл топ,
Аяк баскан ер мен шок!
Язда айлак ярасык, —
Кишкей япалак терек,
Куьзде ол каьрип, язык-
Оны коьрмеге керек!
Казан басы тоьгерек,
Оьзи толган тегенек,
Ел мен бирге тыгырар,
Сага келип каныгар!
Анда — мунда кыдырып,
«Бос хабарлар» ол йыяр,
Ойга-кырга ювырып,
Уьйкен басын ол йояр.
Коьшип юрген ногайдай,
Юмсак оьтпек каппайды,
Эсин йойган халкымдай,
Меканын да таппайды!
Шоьлде талган туьединъ
Авызына туьседи,
Шайналады, едилип,
Басын — коьзин теседи.
Эсинъди йый, камбагым,
Тыгыра бер кайгырма,
Сен коьргенди ким коьрген,
Айлана бер, авырма
2019 год.
Камбак
© Copyright: Альберт Тамакаев, 2025
Свидетельство о публикации №125040506845
Свидетельство о публикации №125040506845
Рецензии