Са руш ава, гьар сефер заз акурла,
Жими хьана авахьда зун гъилерай.
Зун жув жував гумукьдач ам такурла,
Заз чкяар дар жеда и чилерал.
Са руш ава, вилера экв твада зи,
Кьуьзуьвилин зав ишарат гумукьдач.
Верцlи хъуьруьн ава вичихъ, кьада зун -
Рикlе мискьал гъам - хажалат амукьдач.
Са руш ава, лацу, памбаг якарин,
Йифиз - юкъуз темен гайтlа тух тежер.
Зав гва гуьлег адан рикlин ракарин,
Зунни адаз кlанда, лугьуч заз: межер!
Са руш ава, хъиле турла чухвада,
Са геренлай кинарарда, кlан хьана.
Гьикl кьун тийин ихьтин бере пагьара,
Туна хура шуьтlкьуьр тийин гьикl вуна?
Са руш ава, ам акурла, мум хьана
Зи къаяб рикl муьгьуьбатдив ацlуда.
Рахаз чидач - галат хьайла къугъвана,
Кьил эцигна бубад къуьнел, ксуда.
01.04.2025 г.
Са руш ава...
© Copyright: Намик Фарзалиев, 2025
Свидетельство о публикации №125040101089
Свидетельство о публикации №125040101089
Рецензии