Яруш, гьикьван зи ашкъидин хьелер тваз на кlеве, къвазда?
Вучиз вун зав рахун тийиз, яд кьунвай хьиз сиве, къвазда?
Чин элкъуьрмир вун кlанзавай садкай, зун туш ихтибарсуз,
Вуна гузвай давди ягъиз, зи дамарда иви къвазда.
Буш гафар туш ийизвай за, рикl хернава ашкъид хьелди,
Юкъуз акваз тахьайтlа вун, нубат ттуна йифе, къвазда.
Акl хьурай хьи, муьгьуьбатдин чlалахъди яз амукьрай зун,
Къайи хьайтlа зун адакай, гунагьар ви хиве къвазда.
На лугьумир галатда зун ви и хъилетl къилихдикай
Вун хьиз зунни са терсди я, зун къастунал кlевиз къвазда.
19.02.2025 г.
Гъезел
© Copyright: Намик Фарзалиев, 2025
Свидетельство о публикации №125040101057
Свидетельство о публикации №125040101057
Рецензии