Секина. Гьайиф-гьайиф Хуьруьгрин там кузва чи

Рамазандин  пак тир вацра атанвай,
Т1ебиатдал чан атана  диганвай,
Кьве вил к1андай килигдай,гьак1 ч1аганвай,
Гьайиф-гьайиф  ,Хуьруьгрин там  кузва чи.

Хъуьт1уьн къаяр ,живер ц1ран алатна,
Ракъин нурар гьар са тандив агатна,
Бейхабар яз ч1улав гумар  акъатна,
Гьайиф-гьайиф , Хуьруьгрин там кузва чи.

Тар-мар хьана тамун къушар, гьайванар,
Кабаб хьана дагъдин къацу айванар,
Суван  рекъе ава  язух инсанар,
Гьайиф-гьайиф ,Хуьруьгрин там кузва чи.

Тамухъ галаз  куз-хъукъузва гьар са рик1,
Шумуд югъ я руьгьер шехьиз ава ик1,
Лапаткадал  ялав туьхуьр ийиз гьик1 ?
Гьайиф-гьайиф ,Хуьруьгрин там кузва чи.

Рик1 авайбур тьар са ч1авуз  уях я,
Тарар-тамар чи райондин дамах я,
Къе чи накъвар дагъдин михьи булах я,
Гьайиф-гьайиф ,Хуьруьгрин там кузва чи..

Са касдизни к1ани крар  туш абур,
Мецелай гьич хамир саданни хатур,
Чаз  Аллагьди гурай виридаз сабур,
Гьайиф-гьайиф Хуьруьгрин там кузва чи.

Чуьнуьх жемир  лекьер цавун ч1арадик,
Ц1ай туьхуьра  гуьзел тамун харадин,
Сад Аллагьдин гъиле хьуй югъ пакадин,
Гьайиф-гьайиф Хуьруьгрин там кузва чи.