ДАГЪУСТАНДИН ХАЛКЬДИН АРТИСТ РАГЬИМАТ ГЬАЖИЕВАДИЗ
ЧАРХАЧИ-ЧУБАРУК
Чи рик1елай алатзавач гьакъикъат:
Экуьвилихъ физвай ч1авуз Дагъустан,
Лезги халкьдин баркаллу руш, Рагьимат,
Макьаматдиз гана вуна рик1ни чан!
Ватан хуьдай женгерани аскеррин,
Ви манидин ван япаваз гьерекат,
Вилик фена. Далу пата лежберрин,
Зегьметдани къалин хьана берекат!
Ви манидкай чаз чархачи -чубарук,
Хьана ислягь девирдив чун агудай,
Цуьк акъудна дигана чи багъни рук,
Даях хьана четинвилер алудай!
Шалбуз дагъдал хкаж хьана ви мани,
Кук1ушдилай фена аваз милаим.
Лезги элдин рик1е гьахьна, вун к1ани.
Халкь амай кьван амукьда ам мидаим !
Рагьимат гьажиевадиз
© Copyright: Тамила Хуршидова Салманова, 2025
Свидетельство о публикации №125022106817
Свидетельство о публикации №125022106817
Рецензии