Секина. Дидедин ч1ал ша хуьн чна азизбур!

 Дуьньядава гзаф ч1алар, рахадай,               
 Гьардаз  вичин  руьгьдин  жигъир аквада.               
 Чаз  багьа тир, рик1 вичелди ч1угвадай               
 Дидедин ч1ал, ша хуьн чна  азизбур!

 Дагъларни чав дидед ч1алал рахада,               
 Хайи чил чаз, къизил хьтин аквада,               
 Жуванбурун  гъавурда фад акьадай,               
 Дидедин ч1ал, ша хуьн чна азизбур !

 Шалбуз дагъда авай зам-зам, яд хьтин,               
 Безетмишай цуькведавай, гад хьтин,               
 Бубад гъиле теспягьзавай, хад хьтин               
 Дидедин  ч1ал, ша хуьн чна азизбур!

 Пак шаирри,  Самур вац1ун дереда,               
 Теснифзава  шиир, иер жуьреда.               
 Сад ийизвай чи халкь, гьар са береда,               
 Дидедин ч1ал,  ша хуьн чна азизбур !

 Шегьеррани  ава гьардахъ  къуншияр,               
 Сагърай вири, ч1ал хуьзавай лезгияр,               
 Гьуьрмет ийиз, чаз гузавай тербия               
 Дидедин ч1ал, ша хуьн чна азизбур !