Магомед Мирзоев. Шаирдикай кьве гаф

 Йикъарикай са юкъуз, заз хуьрунвидин зенг атана. Каш-мякь авурдалай кьулухъ,
 ада вич Жамилал кьил ч1угваз фенвай, лагьана. Ада рик1ивай  т1алабна, Жамилан
 ктаб чапдай акъудун.               
 - Башуьсте,-  лагьана за,-  гьа кар патал куь хатур хадани. Ам чи гъилевай
 к1валах я. Саваб хьурай, акъудда. Кхьенвай шиирар электронкадиз вегьирай,
 редакциядиз ракъурдайвал.               
 Ада заг  Жамилан номер вугана. За адаз зенг авуна. Жамилани, зи зенгинал вил
 алай хьиз, гьасятда жаваб гана:               
 - Але-е-йкумасала-а-ам, стха! Ву вуч гьалар я?               
 Заз Жамил тахкуна са 20 йис тир, гьавиляй ам авай тегьер зи фикирда хъсандиз
 амачир. Яргъал-яргъал гафар ч1угваз ам рахазвай тегьер акурла, зи рик1елай
 лугьудай гафар алатзавай. Вичини мукьвал-мукьвал хийирдин дуьаяр ийизвай!    
 Са кьадар вахтунда чуна эхтилатар, каш-мякь авуна.  Ахпа, за адавай шиирар
 ракъурун т1алабна. Жамила телефондиз(ватцапдиз) «Лезги газет», «Ц1ийи дуьнья»
 газетрин чинрин шикилар ракъурна.               
 Ибур гьик1 чап ийида! За адан дашан гададиз зенг авуна, электронкадиз ракъурун
 минетна.               
 - Я халу,  вун куькай рахазва, ада электронка гьинай гъида?               
 - Бес адан чап авунвай шиирар компьютерда авачни?               
 - Вучтин компьютер я, вучтин электронка, я халу, вун куькай рахазва? Адавай
 алай чкадлай алкьаз жезвай туш. Ам са хъвалахъ къаткана, телефондин са
 кнопкадал т1уб  я элисзавайди. Маса са карни жезвай туш.               
 - Бес ада шиирар гьикIа кхьизва?               
 - Адан патаг, кьил ч1угваз, гьамиша инсанар къвезва.  Гьа вахтунда ада гьабурув
 кхьиз вугузва чарчел ва я вичин телефонда, ахпа редакциядиз ракъурзава.               
 И гафар ван хьайи, заз бегьем эсер хьана. Жув и гьалда аваз, масадбуруз сабур
 гуз алахънавай Жамилал зун тажуб хьана. Ихьтин инсан лап еке гьуьрметдиз
 лайихлу я!               
 Чна адан шиирар къачун хьайит1а, вирина авайди халкьдиз мергьеметвилиз, чпи
 чпиз гьуьрмет авуниз, саваб к1валахар авуниз, гунагьар, пис крар  тавуниз эвер
 гун я. Месела: «Жуван халкьдиз»
 
 Заз хайи халкь гзаф к1анда...               
 Къуй зи халкьдихъ берекат хьуй,               
 Хъсан карда гьерекат хьуй
 
 Хуьруькай
 Хуьруьгрин хуьр ала рик1ел               
 Ам заз гьакьван масан я.               
 Эй инсанар
 Эй инсанар писвал мийир....
 И шиирриз килигайла, абурун кьиле «Хиялар» т1вар алай шиир эцигайта дуьз
 къвезва. И шиирда Жамил, вич авай гьалдикай рахазва, амма гьа ихьтин гьалда
 аваз, ада садрани кьил агъуз тавуна, вичи вичин рик1е илгьамдин экв куьк1уьрна,
 са ч1авузни вичин гьалди-кай шикаят тавуна, ислягьвилелди, рик1е дугъривал туна
 яшамиш хьун минетзава.
 Шаир, дуьз лагьайт1а, са къаламдин уст1ар туш. Гьар инсанди и дуьньяда са чка
 кьунва. Шаирни дерин, камаллу фикирривди уьмуьрдин четинвилерай кьил акъудиз,
 адан хъсанни пис чир ийиз, вичивай жедай са пай кутаз алахънавай уст1ар я. Сад
 хьтин крар гьарда, вичихъ авай зигьиндиз, кьат1унриз килигна, вичин саягъ
 кхьизва.   Хъсан кхьенвай эсерри чи  рик1ера муьгьуьбатдин, инсанпересдин,
 т1ебиат к1анивилин, жуван ватандал рик1 хьунин эквер куьк1уьрзава.               
 Бязи шиирра чаз, чавай жезвай хесетар писбур яз къалурзава ва абуруз къиметни
 гузва.               
 Пара вахтара  вилер ачухиз,  тийижир к1валахар чир ийиз алахъзава. Бязи вахтара
 са ц1ар дуьз кхьин патал,  шаирди ц1удралди ктабар туп1алай ийизва.  Са
 вахтара, жувазни хабар авачиз, цавай аватай хьиз шиирар арадал къвезва. Садбуру
 лугьуда, абур виняй атанвайбур я. Мумкин я. Шаирарни гьар сад са жуьре я. Белки
 гузва жал! Амма Жамилан шиирар к1ел авурла , зун и кардихъ инанмиш жезва. Вичин
 азардиз килигна, ам  пара кхьинариз агакьнач, амма, кхьенвай кьадардиз
 килигайла, чаз ам пара зурба вик1егьвал авай инсан хьиз аквазва. Алкьаз тежез
 месел алай инсанди, са ч1авузни шикаят авурди туш. Дагъ кьадар авай, са бязи
 итимарин пеше, экуьнлай няналди чпин гьалдикай шикаят авун я. Гьавиляй Жамил 
 чешне къачуниз  герек шаирни я ва гьак1да инсанни!