Таира Муспахова

Жамилакай ихтилат
 Жамилан яратмишунрик къуьн кутуна, адаз гьевес гъиз, адаз куьмек авурбурукай садни Таира Муспахова я! Рик1 гегьенш, вичиз вичин такабурвал авай, к1евевайдан куьмекдиз къведай, виридаз гьуьрмет авай- Заслуженный работник культуры Р. Д., председатель Совета женщин администрации Ахтынского района, Таира ваха вич Жамилахъ галаз таниш хьайивал ахъайна. Сифте йихъалай башламишна, адакай Жамилаз вах хьана.
Ажуз касдиз, к1евевайдаз куьмекар гузвай инсандин
такабурлувал рик1е жеда.  Жамилан руьгь, гьевес виниз хкажай, адаз вичивай жедай куьмекар гайи Таира вахаз чна вирида лугьузва- Ви чан сагърай! Куьн бахтлу хьурай!
         
Таира Муспаховади кхьизва:
   Заз шаир Жамил Хруьгви таниш хьана са акьван пара вахт хьаначт1ани, чи арада яратмишунрин алахъа мягькемди тир.  Гьайиф, Жамилаз четин кьисмет хьана, вични чи арадай лап фад фена. Заз Жамила сабур гудай. Вичизни, аламатдин кар я, зи гуьгьуьлар пис тир ара аян хьана, гьа легьзеда кхьидай ва я зенг ийидай.
 Адан: "Вааах, вун вуч гьал я?" гафари, зун гьасятда залан фикиррикай уяхардай. Вичин чанда авай т1алдиз килиг тавуна, Жамила гуьзел шиирар яратмишзавай, чебни гьич са к1ус перишанвал, ажузвал, кьисметдал ажугълувал авачир.  Адан шиирри инсаниятдиз уьмуьрдал кьару хьуниз, ватандал, т1ебиатдал рик1 хьуниз, сада садаз гьуьрмет авуниз эверзавай. И кар анжах михьи рик1 авай касдилай алакьда.
Адан "Диде" ч1алариз за мани тамамар авуна. Чи мел-межлисрал и мани жемятди тамамарун мукьвал-мукьвал т1алабни ийизва.
Мад вуч ийин? Уьмуьрар я. Сад фад, сад геж, чун вири Сад Аллагьдин патав хъфидайди я.  Жамила чилерал вичин гел туна хъфена.
 Регьметрай вичиз!