Къафкъаз
Дереяр, кlан таквадай, жерге рагар,
Ахъа жез гьар синелай айру дакlар,
Вили аршдиз цаварин ам я гурар,
Такабурдив рехи кьил тик цава кьаз -
Ава Къафкъаз.
Ценинал гад я, кукlушдал жив ала,
Са пата раг, муькуьнал гуьгди тала.
Авани ихьтин ийерд мад - за къала!,-
Гатфариз гуьлчименар куз зар алаз -
Ава Къафкъаз.
Чlарчlарар, гьамга вацlар, гур булахар,
Шавгьарар, кушкушариз вавди рахар,
Варзалай яргъи йифер, а алахьай
Гуз атай мугьманариз савкьат яз -
Ава Къафкъаз.
Са герен ваз аквада марф акатиз,
Гьа сятдани михьи рагъ хкатиз,
Яргъируш, наз гуз ирид нав, акъатиз,
Къалуриз гьяркьуь къуьнер, фурсар адаз -
Ава Къафкъаз.
Акунай заз ам ийер тир береда,
Майдин вацран циферик квай дереяр.
Ахварани аквада а чlереяр -
Эвериз, мад сив ахъайна вичи заз -
Ава Къафкъаз.
31 12.2024
© Copyright: Намик Фарзалиев, 2024
Свидетельство о публикации №124123102645
Свидетельство о публикации №124123102645
Рецензии