Зи жаваб

Теране вахан шиирдиз жаваб яз( авам лугьудайла за умуми инсан незерда кьунва, хсусан Теране вах ваъ)))

Теране Керимова Оружова
ХЪСАН РЕХЪ!

Аман-минет, акъатзавай цIуру йис,
Дикъетдалди кIватIа жуван хъсан-пис.

Тамир на чаз и гваз атай ялавар,
А яракьар – на гайи кьван къилавар.

Мадни хутах вуна гъайи къадаяр,
Каинатдин кьилел вегьей балаяр.

Кьурурна вач - уькIуь накъвар алемдин,
Битав кьунвай цIун мурцарин аламди…

…Атай мугьман даиман яз ацукьдач,
Им дуьнядин къанун я икI амукьдач

Ингье, ви вахт,  фикир, ният - чIуруди,
Ахлад тадиз, ваз хъсан рехъ, цIуруди!

Зи жаваб

Инсандиз мад гьахъ кlанзава йисивай,
Акун тийиз тахсир, вичин хивевай.

Цlуру йисиз мугьман лугьуз ава ам,
Уьмуьр вич гьа мугьманрикай я, авам...

Йис вуч я - ам уьмуьрдиз са савкьат я,
Инсан я ам авуддайди такьатдай.

Мажал гузва, макан гузва гъуцари,
Чилел тирдаз вад къан мугьман, куьчери.

Инсанди бес? Амукьдайд хьиз эбеди,
Къугъваз жеда ам уьмуьрдив къемеди.

Тек са вич туш - несиларни фикирдач,
Тергдач хесет, пашман жедай эхирда!..
28.12.2024