Ашукь рушни шаир

Ашукь руш.
Къе чи кьилел гъетер къугъваз,
К1анивилин гьиссер рахаз,
Ашкъидин ц1у рик1е авай,
Жив ц1урурда дагъларавай.

Шаир.
Шад хьана зун к1анид галаз,
Бахт жагъидач гъейрид галаз,
Яр шаддиз атуй к1вализ,
Гьахьуй ашкъи кузвай рик1из.

Ашукь руш.
Муьгьуьббат за хуьзва рик1е,
Яр ава зи къени рекье.
Авач валай к1ани инсан,
К1аниди, вун я заз масан.

Шаир.
Йифекай югъ авур рагъ я,
Къизил емиш авай багъ я,
Вун галай зун даим сагъ я,
Вун, к1аниди,жегьил чагъ я.

Ашукь руш.
Къведа, гуьзел гатфар къведа,
Атир галай цуьквер жеда,
Хъуьрез-хъуьрез килигда яр,
Шад манидал илигда, яр.

Шаир.
Сагърай ширин зи к1аниди,
Заз муьгьуьббат-гад гайиди,
Вун багьа тир к1ани яр я.
Хъуьт1уьз чими хуш гатфар я.

Ашукь руш.
Мадни гатфар чал элкъвезва,
Цава рагъни чаз хъуьрезва,
Ац1ай вацраз ухшар я зун,
К1анивилин хабар я зун.

Шаир.
Муьгьуьббат я мидаим женг,
Ашкъи, гьевес ийидай генг.
Уьмуьрда чаз кьисметрай бахт,
Куьруь я чаз багъишай вахт.

Ашукь руш.
Зи гъиляй ви гъил ахъаймир,
Залай на гьич вил элямир,
Зун ви гуьзел цуьк я хьи, яр,
Гьич тек тамир зун, к1ани яр.

Кьведни санал.
Лейлиярни Межнунар мад,
Хьайиди я, акъатна ад,
Чи кьисмет чи гъиле ава,
Чун бахтунин геле ава.

12.12.2024.