Аялриз...

            
Жгъа яру къуччагъ я,
Вич верчерин пачагь я.
Чилер чалда, ягъиз кек,
Такабурдин кlватl я кlек.
                ###
Рух чухвада кикерив,
Кичl кутада нуькlерик.
Сейрчи я йиферин,
Кац душман я кьиферин.
                ###
Нивай жеда гьунариз,
Гьахьиз варциз, гъенериз?!
Кlанни жедач вавай пул,
Кицl я хъсан къаравул.
                ###
Мее ийиз жеда ам,
Тадач тефей дере, кlам.
Ам цицlи я, викlегь я,
И чуру квайди цlегь я.
                ###
Гьиргьирдайла: и - гьо - гьо,
Рам ийидай кlанда хва.
Ам игитдин намус я,
Балкlан вафалу дуст я.
                ###
Кьарад жеда кьацlана,
Некlер гуда ацlана.
Недайди векь, къамиш я,
Крчар алайд гамиш я.
                ###
Къулай туш кьаз, цlалцlам я,
Авачирди рацlам я.
Ам цавариз туш белед,
Цин махлукь я балугъ - гъед.
                ###
Къазни, къугъни ухшар я,
Кьведни гьа цин къушар я.
Зулухъ чими уьлкейриз,
Лув хгуда сеферриз.
                ###
Вич  балугърин хзан я,
Адан кlвал океан я.
Катна кlанда акурла,
Йиртижи я акула.
                ###
Туьд яргъи я, цавава,
Ваз килигда къаварай.
Гьейранарда саррафни,
Ийервили жирафдин.
                ###
Чанта ала руфунал,
Шараг акваз кlуфунлай.
Хъел гъайидаз ягъи я,
Кенгуруд кам яргъи я.
                ###
Ингье, вилер чапрасди,
Газар кьунва тапасдив.
Вичихъ авайд кьве кlир я,
Им вуч нефсени къуьр я?!
                ###
Хъуьтlуьз гьатда чилада,
Темпелвилин балада.
Севрез кlанда мереяр,
Виртни ципицlд чlереяр.
                ###
Яцlу кlвачер, зурба тан,
Гьайванрин ам я султан.
Вилик яргъи хуртlум - гъил,
Еке япар галай фил.
                ###
Лацу, чlулав маргъвар я,
Хамун винел гурар я.
Вич балкlандин са жинс я,
Зебра - вагьши, надинж я.
                ###
Икьван екед кац туш эхир,
Им кацин тапац туш эхир.
Зул - зул палту я вичин,
Пеленг я тlвар и кацин.
                ###
Лув гуз кьезил нуькlре хьиз
Чихелрилай чихелриз,
Акъудзава виш уюн,
Зиринг я гачал маймун.
                ###
Куткуз тахьуй шериник,
Агъу гала кlириник.
Кобра жедай чкаяр
Азия, Африка я.
                ###
Азад къуш я цаварин,
Чуьллеринни суварин.
Я кард туш ам, я леглег,
Гуждин лишан лекь я, лекь.
                ###
Аман гудач, залум я,
Верч - цицlибдин къалум я.
Мус демекдиз хьахьна, гьикl -
Ваз чир жеч фендигар сикl.
                ###
Уьркуьтмишмир кьуьгъуьр на,
Хкlватl жеда кухунна.
Гъвечlи ятlан, къеврагь я,
Цацар вичин яракь я.

24.11.2024