Цlингавар яз къугъвазавай
Бицlекдивай жузуна за:
Гьикl ваз дуьнья аквазава,
Гьикl физава уьмуьр таза?
Гъавурда гьат тийир хьтин,
Мягьтел - мягьтел килигна ам.
" Гижи хьанва жеда итим" -
Къугъваз мадни илигна ам.
Цуькверин кlунчl гъиле кьуна
Акъвазнавай булахд рекьел,
Жегьилдиз за суал гана,
Ам бахтавар яни чилел?
Лагьана, кьил япал къатна:
"Фад алата, къвазмир ина".
Саф хъуьруьндин нурар гьатна,
Цел къвезавай рушан чина.
Гьаман суал чуру рехи
Са касдиз за гана кимел.
"Инсан хьанва, чан хва, пехъи -
Ацlукьнавай иблисд кlеме.
Ам акьуллу махлукь тиртlа,
Умунвилер кьадай вердиш...
Секин тушир и девирда
Жегьилрикай я зун тешвиш.
Дуьньядивай вуч жеда кьван,
Я чиливай вуч кlанда чаз?
Ийизвайди вири - инсан,
Фагъир дуьнья дакlанда чаз".
24.10.2024
***
© Copyright: Намик Фарзалиев, 2024
Свидетельство о публикации №124111700824
Свидетельство о публикации №124111700824
Рецензии