Къваналай кек...

Зун дидедиз хьайи Кlелет хуьре Къваналай кек лугьуз са ким ава, вичел алай рехуьн ( патав рехв квай) къванцикай тlвар къачунва...

Къваналай кек, Къваналай кек,
Уьуь ийиз къуншидин кlек
Рахайдалай йиф жедалди
Кас жеда вал, тадач вун тек.

Шумуд асир акунва ваз,
Шумуд несил тlветlрей такьаз
Ракъурнава на дуьньядлай...
Вун дегиш жен - акунач чаз.

Кlеняй физвай Чlехи вацlун
Фадлай хьанва дердер яцlу.
Атlа; пата амач уьруьш -
Гатфаризни жезмач къацу.

Дегиш хьанва къе замана,
Кьатlузмач хъсан, яман на.
Чагурга хьиз чlулав пехъер
Эляй хьанва, дад - аман я.

Лезги чилер пай хьанава,
Лезги хуьрер зай хьанава.
Къваналай кек, ви кимелни
Дад кумачир къай хьанава.

Къваналай кек, къван хьана вун,
Ягъийриз къе кlан хьана вун.
Вегь тlун вуна абрун кьилел
Ви къван хьтин харар цавун.

Къваналай кек, мад вуч лугьун,
Къакъатнава къе зунни вун.
Ви кимел зи акъатай къар
Са уьмуьрдихъ квайд тир стlун...

Атlа пад - вацlун а пата хъсан уьруьшар, талаяр тир, гьаниз Атlа пад лугьуда кlелетвийри, гила вири мугъулриз маса ганва, виллаяр эцигнава, хеб - мал хъфидайвал амач( Къваналай кикен кlеняй вацl физва, а вацlуз Чlехи вацl лугьуда, хуьруьн муькуь патайни вацl физва, яд Чlехи вацlундилай тlимил я, Гъвечlи вацl я тlварни).
11.09.2024