Безамаш буьйцу хан дlайахна олу.
Аьрхачу даго ша реза дац олу.
Гlиллакхах кхоллало лараман тай.
Цунах ду дегнашна йуккъера тlай.
Дистина догlу хи-м меттанаш дай.
Цаьрга и дохалахь, дерриге дай.
Хиллариг дlадаьлла, бlарлагlа йисна.
Ткъа цунах тийсалуш, вай хlунда дисна?
Хиллачун lиндагlах ийзалуш lахь,
Ирс гур дац азаллехь, мичча вай гlахь.
Кеманна, мох лаца, паргlато оьшу.
Бердах и дихкича, заманца лоьшу.
Ца къуьйлуш, схьадаста деттало дог.
Тохийта дахаре сатесна ног.
Безаман хан
© Copyright: Джамал Дударов, 2024
Свидетельство о публикации №124110900431
Свидетельство о публикации №124110900431
Рецензии
