Молитва при трудных родах

ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ И ПРИСНОДЕВЕ МАРИИ ПРЕД ЕЯ ИКОНОЮ,
ИМЕНУЕМОЮ ФЕДОРОВСКОЮ.
К кому воззову, Владычице, к кому прибегну в печали моей; к кому принесу слёзы и
воздыхания моя, аще не Тебе, Царице Небеси и земли: кто исторгнет мя от тины
грехов и беззакония, аще не Ты, о Мати Живота, Засутпнице и Прибежище рода
человеческаго.
Услыши стенание мое, утиши мя и помилуй в горести моей, защити в бедах и
напастех, избави от озлоблений и скорбей и всяких недугов и болезней, от враг
видимых и невидимых, умири вражду стужающих мне, да избавлена буду от клеветы и
злобы человеческия; такожде от своея ми плоти гнусных обычаев освободи мя.
Укрый мя под сению милости Твоея, да обрящу покой и радость и от грехов очищение.
Твоему Матерному заступлению себе вручаю; буди мне Мати и надежда, покров и
помощь и заступление, радость и утешение и скорая во всем Помощница.
О чудная Владычице! Всяк притекайя к Тебе, без Твоея всесильныя помощи не отходит:
сего ради и аз, недостойная, к Тебе прибегаю, да избавлена буду от внезапная и
лютыя смерти, скрежета зубовнаго и вечнаго мучения. Небесное же Царствие получити
сподоблюся и Тебе во умилении сердца реку: Радуйся, Мати Божия, Предстательнице
и Заступнице наша усердная, во веки веков. Аминь.
("Семейный молитвослов"; "Артос - Медиа"; Москва; 2008 год)