Дагъви тушни

Бармак лацу балкIан лацу я лезгияр
Яйлах кьуна физва къацу я лезгияр
ВацIар агъуз вич фейиди гьамгадал
Дагъви тушни ан викIегь хва я лезгияр

Шагь дагъларин кьилин кукIвал я лезгияр
Цавун къашдиз хьанвай мукьвал я лезгияр
Ан кукIушра муг кутунвай ан шагь лекьерин
Дагъви тушни ан викIегь хва я лезгияр

Къай акьунвай япунжида я лезгияр
Акъваз хьанвай рагун чина я лезгияр
Черкиналди лапаг тукIваз акI алакьдай
Дагъви тушни ан викIегь хва я лезгияр

Шиш чархара кIвалер ама я лезгияр
Тарих кхьей къванер ала я лезгияр
Анжигъира гелер авур акI четин тир
Дагъви тушни ан викIегь хва я лезгияр

Малкамутдин кьилелай чун я лезгияр
МугьитIрал кьван килиг авун я лезгияр
Са лекь хьана лувгуз акун гьар са уьлкве
Дагъви тушни ан викIегь хва я лезгияр

Къугъваз жедай гъуьрчеривди я лезгияр
Шал хьиз гьатдач пуьрчерикай я лезгияр
Квачеривди серт сийрихар акI атIанвай
Дагъви тушни ан викIегь хва я лезгияр

Бару кьунвай тахта чархав я лезгияр
Гатуз живед маргъал атIуз я лезгияр
Чаз къекъведай жигъир кутур акI рагара
Дагъви тушни ан викIегь хва я лезгияр

ЧIулав шимел цанва никIер я лезгияр
Кватан квачиз жуван гъилел я лезгияр
Чаз багьа тир тарихар акI хвенавай
Дагъви тушни ан викIегь хва я лезгияр

Ан Фиярин четин хуьре я лезгияр
Квар кьуьневаз вацIун рекье я лезгияр
Гам храна рагарал физ экIядай
Дагъви тушни ан викIегь руш я лезгияр

Ашукь Ширин чешне къалуз я лезгияр
Дуьньядилай элкьвей чIавуз я лезгияр
Чуьнгур кьуна мани лугьуз ан сувалай
Дагъви тушни ан викIегь хва я лезгияр

Бубайри чаз гай хесият я лезгияр
Кьабул ая яз весият я лезгияр
Ашукь Шемшир хвез несият ин бегьердин
Дагъви тушни ан викIегь хва я лезгияр