Гурмагъдин гум ат1ай,
Ник1еркай тум хкатай,
Туьрезар байтул хьайи,
Хивегьнар* макъул хьайи,
Я дердиниз дарман тахьай.
Я аллагьдиз т1ува* татай,
Я иеси ясардин*!
Ацукьайла зар хьтин,
Къарагъайла базар хьтин,
Ц1уд т1уб ц1уд туьмен,
Кафандин хун квери хьайи,
Хейратдин аш кьери хьайи,
Я иеси ясардин!
Демекда к1ел авайди хьиз
К1вале куьлуь балаяр авай.
Ракьарал пас алай,
Яцарал яс алай,
Я иеси ясардин!
За гила кквел кьил эцигда,
За гила кквел гъил эцигда?
К1валинбуру к1валяй ахкъудди,
Хуьруьнбуру хуьряй ахкъудди,
Я иеси ясардин!
Ви балаяр за гьик1 хуьда?
Вац1 атайла вац1ув вугудани,
Ц1ай авай т1анурдиз вигьидани?
Заз абрун гъил гъиле кьуна
Уьркуьтмиш жез к1анзва,
Я иеси ясардин!
(Агъа-Арагъ, Айна Ших Агьмедова.Ноябрь-1940 Йис).
*Хивегьнар-хивелагар.
*Т1ува- язух татай.
*Ясардин-яс кьунвайбрун иеси.
25. Гъуьл кьейила
© Copyright: Магомед Мирзоев Мирзой, 2024
Свидетельство о публикации №124082106963
Свидетельство о публикации №124082106963
Рецензии