Хва хьанва аскер

Ватандин буйругъдиз гьазур я жегьил,
Варцелла чара жез, кьаз са-садан гъил.
Велед чIехи авур вине кьунвай кьил,
Шадвилин накъварив ацIанва вилер,
Бахтлу я къе диде: хва хьанва аскер.

Шарвилидин саягъ чIехи хьана хва,
Пагьливандиз ухшар я, шадариз арха.
Чина нур, мез ширин, рикIни яз заха,
Пашман туш кIусни ам, сивел ала хъвер.
Бахтлу я къе диде: хва хьанва аскер.

"Вун лекь я кукIушар рамзавай кьакьан,
Лезгидин намусдик кутамир нукьсан,
Эркекдин буржи я хуьн хайи Ватан.
Ихтибар айизва вал хуьдай сенгер", –
Бахтлу я къе диде: хва хьанва аскер.

Рази я жавабдал баладин вичин:
"Рекье тваз атайбур, авурбур кIвачин,
Зун патал, диде, куь яру жедач чин"
Япара ава ван, айизва эзбер:
Бахтлу я къе диде: хва хьанва аскер.

Кьилиз акъудна Ватандин буйругъ,
Са легьзе фейи хьиз, акьалтIда къуллугъ.
Хва тамам жегьил яз, вич акьулбалугъ,
Хкведа кьегьал хьиз, къурмишда мехъер,
Бахтлу я къе диде: хва хьанва аскер.