Дидедин къужах

И йикъара зи яратмишунрин уьмуьрда кьет1ен вакъиа хьана. Махачкалада "Мавел" чапханада зи нубатдин, кьведлагьай ктаб "Дидедин къужах» чапдай акъатна.   Ам гьихьтинди хьанат1а, къимет, гьелбетда, к1елзавайда гуда.
   И ктабдинни садлагьай экземпляр за, гьа сифтегьан «Кварцин нур» ктабдин хьиз, жуваз сифте экв къалурай, заз пис-хъсан чирай, инсанрин арада жув тухудай къайдаяр чирай, чеб гьамиша зи кьве лув хьайи зи иладриз – зи дахдизни дидедиз багъишна.
Белки, зи ктабар акъатдачир, бязи инсанар, гьерекатар хьаначирт1а. Дуьз лагьайт1а, заз ахьтин къастарни авайди тушир. Абур са бязи къени инсанрин таъсирдик кваз хьайи крар я. Гьелбетда, инсанар гьар жуьрединбур я. Акъвазмир, кхьихь лугьудайбур пара хьана. Нетижада кьведлагьай ктабни арадал атана. Зав к1валах ийиз тур, зак руьгь кутур ва руьгьдай авудиз алахъай гьар садаз кьилди сагърай лугьузва за.
Зи яратмишунриз кьет1ен къимет гайи, шииратда зак гьевес кутур, зи къелемдиз къуват гайи, рик1ин, кьилин, бажарагъдин ч1ехивални кваз такьуна, дикъет гана чпин инсанвал, къайгъударвал, лезгивал къалурай ксаризни за пара кьван сагърай лугьузва. Аллагь чпелай рази хьурай!
Са камалегьлиди лагьанай: хъсан инсанар писбурулай гзаф я. Фейсбукда за сифте кьилерай жуван шиирар эцигайла, бязи шиирар газетриз акъатайла, гзафбуру зи ц1арариз ч1ехи къиметар ганай. Абуру зак лувар кутунай. Аллагьди хуьрай чеб!
 Амма лувар хаз алахъзавай чайгъунарни авачиз тушир.  Абуру зи къаст мадни лигимарна. Сагърай гьабурни, регьим атурай чпиз!
Ктабар, гьелбетда зи ц1арариз къимет гузвай, абурухъ вил галай, лезги шииратдал кьару, инсанвал к1ани гьар са ватанегьлидал агакьда.
Квехъ сагъвал хьун к1анзавай, куь ватанпересвал, лезгивал мадни лигим, мадни туьнт жедайдахъ вил галай, Тамила Хуршидова.