Хъвач дидейрив, бубайрив...

Мукьвал - мукьвал, яргъал велед, хъвач мугьман,
Жув акъатай чилерал.
Гьич тахьайтlа диде - буба амай кьван -
Экв хьуй абрун вилерал!

Кьил чlугваз хьухь жуван гъвечlи ватандал,
Вуна мажал жагъура.
Гъурбатдин гур марфари вун гатайла,
Рикlин муркар агъурай!

Ви тандавай гьар са эзел, къени цlир
Гьа чкайрин бегьер я.
Вахче на бурж, акl жемир вахъ авачир, -
Алахъна гьар тегьердалд!

Хъвач дидейрал, бубайрал чан аламаз -
Куь ял - нефес къачурай.
Тамир абур хтулрихъ вил галамаз,
Са тlимил нефс ацlурай.

Квез акl жемир диде - буба и фана
Дуьнья кьуна амукьда.
Аквада квез, амачир югъ атана,
Куьн гъамарик кумукьда.

Алцур жемир гьеле заз вахт ава луз -
Вахт гъилик квай сят туш.
Вахтунин сирр чизва анжах цавариз,
Вяде лун чал аватиш.

Квадарайла жедай седдин  парарин -
Аватзавай къуьнерал,
Пашманвили ахпа гъидай паярни
Жем таххьурай винерал.

Яргъаравай веледар, кьил чlугваз хьухь,
Диде - буба сагъ амаз.
Ахпа гьикьван куьн мажалар аваз хьуй -
Гьич хъжедач хъфиз кlанз...
13.06.2024