***

Дишегьлийрин сувар я къе, лезги диде, вахар, рушар -
Мубаракрай лугьузва за квез шиирдив чlал ахъайиз...

Ахъайиз...

Гатфар къвезва, вичин геле къацу махпур шал акайиз,
Хур кутуна гьализ мекьер, цуькверин чим, ял ахъайиз.

Мад гад хквеч лугьур сувар, икlни умуд хкуддани-
Къати живер селлер хьанва дереда шел, къал ахъайиз.

Билбилдизни кlанда гатфар, сейринал рикl алай  гевил
Жезни сугъул, тlебиатдин ихьтин ийер гьал ахъайиз?

Ахварикай хъуьтlуьн,  кватна хуьр - кlвал, йикъан ква къайгъудик,
Уьруьшрал мад чан хканва эллери хеб - мал ахъайиз.

Булахдал фир жигъир амач, къацу, гьяркьуь сумахдин рехъ -
Лезги рушар цел физава чуьнуьх тийиз хал, ахъайиз.

Къузайрамай муркар - живер чиляй къвезвай чимер акьаз,
Цlана физва хъуьтуьл накьвар падна, вичиз хвал ахъайиз.

Гатфар вуч я кьатlанвачир гьеле тlимил тир яшара,
Бицlекривай кичlез, жезвач дидейрин цен, къвал ахъайиз.

Кlанивилин вяде я хупl, чанда гьиссер уях жедай,
Лув куткудай мурадрикай, рикlе хуш - агьвал ахъайиз.

Вазни , Намик, шиир кхьиз руьгь атанвай са легьзе я,
Са бязибур хьтин жемир жуван дидед чlал ахъайиз.
08.03.2024