***

Низами Генжевидай...

И къиса за аял яз проза хьиз кlелнава, шиирдалди акуначир. За ам лезги шиирдал кхьин къарарна))

Ава риваятра, гуя шагь Багьрам,
Магьир гъуьрчехъан тир са пара тlарам.
Гьар сефер авинай хтайла гваз гъуьрч,
Ийиз яцlу гафар тарифардай вич.
Авай Фитне лугьуз адаз къуллугъчи,
Тарифиз жедачир ада шагь - авчи.
Садра шагьди себеб жузуна вучиз,
Адан мецел къведач тариф луз вичиз.
Жавабна Фитнеди: - гъуьчрен вил ядай
Шагьдинди магьирвал туш, я вердишдай.
Хъиляй экуь дуьнья ахкунач вилиз,
 - Ягъ гардан, - эмирна кьушундин кьилиз.
Вуч лугьуз жеда хьи, шагьдин эмирдиз?
Кьушундин кьили ам тухвана рекьиз.
Адаз шагьдин хесет хъсан чизвайд тир:
Эликьда са къуз хъел, дехгишда фикир.
Адаз пуд гьавадин авай имарат,
Фитне ацlукьарна гьа кlвале регьят.
Мал - къара пара тир кьушундин кьилиз,
Рухуна, са бала хьана са кализ.
Акьван ийер тир хьи, ам акур Фитне
Гьалават хьана хуьз ам къайгъуд къене.
Гьар юкъуз гурарин кьилиз акъудна,
Тlуьн гана, къугъвана, ахпа ахвудна.
Залан жез тир дана гьакl югъ - къандавай,
Артух са вижевай жангав хьанавай.
Чир хьанвай кьушундин кьилиз Фитнед сир,
Са къуз илифарна ада шагь эхир.
Нез - хъвадай береда саки дуьшуьшдай,
Ихтилат кутуна зурба рушакай.
Шагь чlалахъ тахьана, эмирна гьаман:
-Гъваш, герек заз жуван вилерив акван!
Ракъурна къуллугъчи Фитнедин патав,
Шагьдин агакьарна серенжам адав.
Назик къир вегьена Фитнеди чиниз,
Акъудна зурба яц гурарай виниз.
Шагьди мягьтелвалнач рушан гьунардиз,
Са ади амал хьиз килигна кардиз:
-Им ви гужлувилин туш гьич ишара,
Дана гъвечlидамаз на кьур вердиш я!
Фитнеди жавабна: гьикl жен гъуьрч виляй
Ягъун магьирвал я, им - вердишвиляй?
Лагьана акъудна чинай назик къир,
Шагьди шадвилерна, ам хъхьана чир.
Шагьди руш сарайдиз хкана шадман,
Мехъерна вичизни Фитнедиз гьаман.
Авуна кьушундин кьилиз бахшишар,
Ганач луз Фитнедин чандиз са зарар.
02.03.2024