Темпел сев 2

       2

Йиф гьа ик1а акъатна,
К1усни ахвар татана,
Экв хьайила киц1ерин
Элуькьар сес атана.

Хев кавачир темпелдиз
Къарагъиз к1анз меселай,
Чара хьанач, къудгуна,
Киц1 акурлай винелай.

Кич1е хьайи гьайбатдай,
Ц1айлапан хьиз катна ам,
Дуьня хшу хьайила,
Лап бегьем галатна ам.

Гьахьна мад са дагьардиз,
Вичи вичив мурмурна,
Пешерикай, хилеркай
Мадни са муг туьк1уьрна.

И йифни гьак1 четиндиз,
Ахвар текъвез акъатна.
Мад экуьнахъ киц1ерин
Элуькьар сес акъатна.

Мад фикирна темпелди,
(Ахмакьвални залан я)
Киц1ер вичел атайт1а,
Вични зурба гьайван я.

Гьа ик1 са-сад фикирар
Къвез хъфена келледай,
Киц1ерин пис сесери
Акъудзавай зегьледай.

Мадни гъанач бахтуни:
Киц1ер патав акъатна,
Фагъирдини ин сефер,
Мадни агъур гъалат1на.

Пара хьайла киц1ерни,
Дяве авун четин я:
Гьар сад саник кк1ана
Хам къазурун мумкин я.

Гъуьрчехъанри ван атай
Севрен рик1из хак фена,
Бедендай зурз акьалтна
Са ГЭСдин пад ток фена.

Ц1айлапандилай йигинз
Катзава ам чухурдай,
Ахмиш хьайи киц1ери,
Як акъудиз ятурдай.

Гужуналди къакъатна
Гъуьрчехъанрин хурукай,
Йиф къведалди дагълариз
Ялна севре тамукай.

Рик1 акъатиз хуравай,
К1вач к1вачерихъ галк1ана,
Мез аватна шатал хьиз,
Тарцин к1аник къаткана.

Вилелай къвез алахьиз,
Вичи вичин язух гъиз,
Фикир гайла хъсандиз,
Аквадай са аюх хьиз.

Им вуч гьал я авайди-
Сев яни им, яц яни?
Тахьайт1а им хам алай,
Са гьак1ан к1арк1ац1 яни?

Темпелвилихъ виринра
Вичин са кьадар ава.
Иданди, дуьз лагьайт1а,
Кьейидаз ухшар ава.

И сеферда къакъатна,
Делибурун сараркай,
Крут-крут куьрс хьана
Яру иви ч1араркай.

Мад гакьурт1а киц1ерив,
Уьмуьр якъин пуч жеда.
Гъуьрчехъанриз ктугай
Хът1уьн кьула гъуьрч жеда.