Темпел сев 1

         1

Са сев хьана. Авайвал
Ахъайда за, юлдашар.
Гьинал эхир къведат1а
И темпелдин, тамаша.

Зулуз вири севери
Ягълу к1ват1из к1валахдай,
Чи темпел сев нисинлай
Кьулухъ ахпа къарагъдай.

Са виш уюн акъудиз,
Век акурла, яц хьтин
Ракъиник ам къаткидай,
Бередаллай кац хьтин.

-К1валах ая,- лагьайла
Галай кьвези севери,
Садни семиш тавуна,
Жедай вичиз кефериз.

-Къайгъу авач,-лугьудай,
-Зун тамарин агъа я!
Кич1е жемир, стхаяр:
Кьуьд гьелелиг яргъа я...

Гьа ик1 йикъар къвез фена,
Жив атана цаварай
Ацукьзавай явашдиз
Яру-ц1ару суварал.

Недай-хъвадай къит хьайи,
Аяздини т1уш гана,
Акваз-акваз севре гьал,
Умун хьайи буш хьана.

Экъуьгъайт1а хъсан я,
Яргъийрикай хийир туш,
Акьул вичиз атурай!
Акъваза: гьал эхир туш.

Ваъ!-лагьана темпелди,-
Ик1 зи гьалар ч1ур жеда,
Гишилавни, микьилав
Бегьем беябур жеда.

Гьахьна амай валариз,
Къакъудна жив тапасрив,
Пешер кьула авуна
Вичиз са муг, сарас тир.

Ярхар хьана, винелай
Хилеривди к1евирна.
-Гатфаралди ксуда,-
Лугьуз ада фикирна.